Kudu Lasagna

Hoekom is ek so obsesief oor wildsvleis? Ek het grootgeword daarmee – tot op ’n punt waar ek behoorlik gatvol was vir springbokvleis teen die tyd dat ek die huis verlaat het. Elke jagseisoen was daar biltong, droëwors, en n paar pakke vleis onder in die diepvries. Destyds het ek gedink ek sal nooit weer wildsvleis eet nie.

Maar jare later, hier in die stad, tref die realiteit van vleispryse jou soos ’n klap in die gesig. Vleis is nie net belaglik duur nie – die kwaliteit is lagwekkend. En almal is nou mal oor goed soos “free-range,” “grass-fed,” en “sustainable.” En selfs dan is die vleis wat ons kry... wel, nie juis great nie.

Toe, soos ’n weerligstraal, slaan dit my: my ou vyand – wildsvleis! Wat is méér “free-range,” “grass-fed,” en “sustainable” as wildsvleis? Die Amerikaanse toeriste betaal ’n arm en ’n been om ’n stukkie kudu by die Waterfront te proe, maar hier by die huis trek ons ons neuse op daarvoor.

Maar hoekom’t ek dit dan so gehaat? Want dis nie bees of lam nie. En jy kan dit nie net soos bees probeer gaarmaak nie (jammer, Moeks).

Dis ’n ander dier, met ’n ander tekstuur, en dit vra vir ’n ander benadering. Nou probeer ek wildsvleisresepte ontwikkel wat jy rêrig sal wil eet – wat selfs my 15-jarige self sou geniet het.

En wie weet – dalk gaan ons hierdie jagseisoen nie weer die bokvleis onder in die diepvries vergeet tot volgende winter nie.

Bestandele:

Vleissous:

• 70g Uie

• 35g Seldery

• 35g Wortels

• 15g Knoffel

• 200g Spek

• 2 Rooirissies

• 25g Pietersielie

• 15g Roosmaryn

• 15g Botter

• 500g Kudu maalvleis

• 400g Vark maalvleis

• 375ml Rooiwyn

• 400g Tamatie puree (1 blik)

• ½ Suurlemoen

• 1 parmesaankors

• Olie van 1 blikkie gerookte mossels

• Sout en peper, na smaak

• Olie, vir braai

Béchamelsous:

• 150g botter

• 150g meel

• 1.5L melk

• Sout en swartpeper

• Neutmuskaat

• Vars gerasperde parmesan

Ander:

• Lasagnavelle (winkelgekoop of vars)

• Ekstra kaas vir bo-op (opsioneel)

👨‍🍳 Metode:

Vleissous:

1. Berei al die bestanddele voor: kap die uie, seldery, wortels (mirepoix), knoffel, rooirissies, kruie en spek.

2. In 'n groot pot, verhit 15g botter en 'n bietjie olie. Braai die spek tot dit bros is. Haal uit en sit eenkant.

3. Voeg die mirepoix by die spekvet en braai oor medium hitte vir sowat 15 minute tot die uie deurskynend is.

4. Voeg die knoffel by en braai nog 5 minute.

5. Roer die tamatiepuree in en braai totdat dit effens donkerder en dikker raak – dit gee die sous 'n lekker diep geur.

6. Voeg die spek terug, en gooi die kudu en vark maalvleis by. Braai tot die vleis mooi bruin is.

7. Voeg die rooiwyn en die tamatieblokkies of -puree by. Roer goed deur.

8. Voeg die pietersielie, roosmaryn, rooirissies en suurlemoensap by.

9. Plaas die parmesaankil in die pot vir ekstra geur.

10. Laat die mengsel op ’n lae hitte prut vir minstens 1 uur, met die deksel effens oop, sodat die geure ontwikkel en die vloeistof kan reduseer.

11. 10 minute voor dit klaar is, voeg die olie van die blikkie gerookte mossels by. Roer deeglik deur – dit is die geheime geurkrag!

    
    

    

    
    

Béchamelsous:

1. Smelt die botter in 'n kastrol oor matige hitte.

2. Voeg die meel by en klits aanhoudend tot dit 'n gladde pasta vorm.

3. Kook die mengsel vir ongeveer 2-3 minute totdat dit ’n neuterige geur gee.

4. Voeg die melk geleidelik by terwyl jy klits – maak seker daar is geen klonte nie.

5. Kook die sous tot dit dik en glad is.

6. Geur met sout, peper, neutmuskaat en gerasperde parmesan.

7. Bedek met kleefplastiek wat die oppervlak raak om te verhoed dat ’n vel vorm. Sit eenkant.

   
   

Lasagna Bou:

1. Voorverhit die oond tot 180°C.

2. Kook jou lasagnavelle vir ’n kort tydjie sodat dit nie te hard is nie.

3. In ’n groot oondbak, begin om lae te bou:

   • Begin met 'n laag van die vleissous

   • Dan 'n laag pasta

   • Dan 'n laag béchamelsous

   • Herhaal die lae en maak seker jy het minstens vier lae pasta

4. Eindig met béchamelsous en strooi ekstra kaas oor indien jy wil.

5. Bak vir 40 minute of tot goudbruin en borrelend.

6. Laat die lasagna 30 minute rus voor jy dit sny – dit help dit stel en sny netjieser.

🍽️ Bedien:

Lewer sowat 6 porsies. Perfek vir ’n aandete of as ’n heerlike meal prep gereg vir die week!